Ruta 6. Costa Doce (PR-G 96)

A ruta comeza no Castelo de Fontán, no porto de Sada, e discorre por este antigo pobo mariñeiro, ata a entrada no Monte do Pobre ou A Canteira. Neste punto pódese escoller entre continuar pola costa ou polo antigo Camiño Real.

A ruta lévanos ata tres miradoiros con zonas de descanso. O primeiro nas inmediacións da Punta da Herba, dende onde se pode ver a praia de Morazón e a Pena da Herba. O segundo é o Miradoiro da Ria, no que existen unhas excelentes vistas panorámicas. A partir deste punto a ruta continúa polo litoral ata chegar á chaira da Praia da Arnela onde se sitúa o terceiro miradoiro. Continuando polos camiños existentes, enlázase cunha pista asfaltada que lleva a carón do Cruceiro de Carnoedo e, un pouco máis adiante, ao lugar de Pedreira.

A ruta continúa entón por un camiño que atravesa bosques mixtos e deixa entrever a ría. Chegados ó Campo da Cruz descéndese ata a Punta de San Mamede, onde existe unha vista magnífica da Ría de Betanzos e da de Ares.

Logo dunha serie de pistas forestais que amosan unhas excelentes vistas costeiras chégase á praia de Cirro, que é o punto de remate e onde se enlaza ademais coa ruta da Costa Norte de Oleiros (ruta 5).

A. Castelo de Fontán-Cruceiro de Carnoedo:
Percorrido: 2,4 km
Duración: 1 h
B. Cruceiro de Carnoedo-Praia de Cirro:
Percorrido: 7 km
Duración: 3 h
Dificultade: Baixa
Tipo de trazado: Lineal, bidireccional
Punto partida: Castelo de Fontán
Punto chegada: Praia de Cirro
Concellos polos que pasa: Sada